Author: New Jerusalem Ministries

పరలోకరాజ్య మర్మములు ఎరుగుట మీకు అనుగ్రహింపబడియున్నది… మత్తయి 13:11

పల్లవి : అందమైన దేశము పరలోకము

ఆనందముగా ఉంటుంది చిరకాలము(2)

1. పాపముండదు – అచట శాపముండదు

    దుఃఖముండదు – అచట చీకటుండదు(2)

    ఆహా మా యేసు రాజుగా – చిరకాల మేలుతాడు (2) ॥అంద॥

2. దూతలుంటారు – జీవ గ్రంథముంటుంది

    భక్తులుంటారు – జీవ వృక్షముంటుంది

    ఆహా మాయేసు రాజుగా – చిరకాల మేలుతాడు       ॥అంద॥

… వచనముల భావము వారికి తెలిపెను. లూకా 24:27

1. పాత క్రొత్త నిబంధనలందున – అరవైయారు పుస్తకముల్

    పేర్లు తెలియవలెననిన – దైవ కృపచే విభజించి పాడ వలయున్

2. పాత నిబంధన యందలి గ్రంథముల్-ముప్పది తొమ్మిదియు

    మరి క్రొత్త నిబంధన – యందున ఇరవై-ఏడు పుస్తకములును

3. ఆదికాండము, నిర్గమకాండము, లేవీయుల కాండము,

    సంఖ్యా, ద్వితీయోపదేశ కాండముల్, యెహోషువ,

    న్యాయాధి పతులు, రూతు

4. మొదటి సమూయేలు, రెండు సమూయేలు

    మొదటి రెండు రాజులును

    మరి ఒకటి రెండు దినవృత్తాంతములును, ఎజ్రా, నెహెమ్యా, ఎస్తేరు,

5. యోబు, కీర్తనలు, సొలొమోను సామెతల్, ప్రసంగి, పరమ గీతము

    యెషయా, యిర్మీయా, విలాపములు, యెహెజ్కేలు,

    దానియేల్, హోషేయా, యోవేలు,

6. ఆమోసు, ఓబద్యా, యోనా, మీకా, నహూము, మరి హబక్కూకు,

    జెఫన్యా, హగ్గయి, జెకర్యా, మలాకీ, చెప్పితి ముప్పై తొమ్మిది

7. మత్తయి, మార్కు, లూకా, యోహాన్, అపొస్తలుల కార్యములు,

    రోమా, ఒకటి, రెండు కొరింథీయులు, గలతీయ, ఎఫెసీయులు

8.  ఫిలిప్పీయు, కొలొస్సయు, ఒక థెస్సలోనికైయ,

    రెండు థెస్సలోని కైయులు

    ఒకటి, రెండు తిమోతి పత్రికలును – తీతు, ఫిలేమోన్ పత్రిక,

9. హెబ్రీయులును, యాకోబు, పేతురు – ఒకటి, రెండు పత్రికలన్

    యోహాను వ్రాసిన పత్రికలు మూడును – యూదా, ప్రకటనయు

10. అరవై ఆరును దేవుని చేత – నీయబడిన వేదము

     దాని మోకాళ్ళ మీద ప్రార్థన తోడ – అనుదినము చదువుడి

…అయితే ఆత్మ ఫలమేమనగా,… గలతీ 5:22

స్వీకరించుము విశ్వాసముతో – పాపక్షమాపణ రక్షణను     (1)

పరిశుద్ధాత్మను పొందిన నీవు – ఆత్మ ఫలము ఫలించుము (1)

ఆత్మఫలములో తొమ్మిది – రుచులున్నవి గమనించుము     (1)

ప్రేమ, సంతోషము, సమాధానము, దీర్ఘశాంతము                                (2)

దయాళుత్వము, మంచితనము, విశ్వాసము, సాత్వికము (1)

ఆశానిగ్రహము                                                                                  (2)

విత్తువాని గూర్చిన ఉపమాన భావము వినుడి… మత్తయి 13:18

పల్లవి : విత్తనాలు విత్తుటకు విత్తువాడు బయలుదేరెను        (2)

అవి విత్తుచుండగా కొన్ని త్రోవ ప్రక్క పడెను             (2)

పక్షులు వచ్చి వాటిని మ్రింగివేసెను                                (2)

1.మరికొన్ని విత్తనాలు – రాతినేల మీద పడెను         (2)

    వాటిలో వేరు లేనందున – అవి ఎండిపోయెను      (2)      ॥విత్త॥

2. మరికొన్ని విత్తనాలు – ముండ్లపొదలలోన పడెను

    ముండ్ల పొదలు ఎదిగి – వాటి నణచి వేసెను                        ॥విత్త॥

3. మరికొన్ని విత్తనాలు – మంచి నేల మీద పడెను

    ముప్ప – దరువదంతల్ – నూరంతలు ఫలియించెన్          ॥విత్త॥

4. వాక్యమును విని, గ్రహించి – దాని ననుసరించువారు

    సఫలులై ప్రభు యేసులో – బహుగా ఫలించెదరు                ॥విత్త॥

…నా సేవకుడు నేను ఏర్పరచుకొనినవాడు… యెషయా 42:1

సిద్ధపడుము – దేవుని సేవకై (2) నిన్నేర్పరచుకొనె – దేవుడు                (1)

నీతో నిలిచి – నీకు తోడైయుండున్-లేచి నడువుము దేవునితో         (2)

…అతని దేహము పసిపిల్ల దేహమువలెనై అతడు శుద్ధుడాయెను. 2 రాజులు 5:14

పల్లవి : సిరియా దేశపు సైన్యాధి పతి శూరుడు నయమాను (2)

అయినను అతడో కుష్టరోగి, అదియే విచారం (1)

అతనికి అదియే విచారం(1)

1.ఎన్నో మందులు తిన్నాడు – ఎన్నో పూజలు చేశాడు

    అయినను రోగము తగ్గకపోయెను – అదియే విచారం (1)

    అతనికి అదియే విచారం (1)                                    ॥సిరియా॥

2. ఇశ్రాయేలు చిన్నది చెప్పిన – సువార్త విన్నాడు (1)

    అతడు సువార్త విన్నాడు (1)

    ఎలీషా యొద్దకు వేగమే వెళ్ళి విన్నతి చేశాడు

    అతడు విన్నతి చేశాడు (1)                                                         ॥సిరియా॥

3. యోర్దాను నదిలో ఏడుమార్లు ఎంచి మునిగాడు

    అతడు ఎంచి మునిగాడు

    శుద్ధుడై పరిశుద్ధ దేవుని మహిమపరచాడు

    అతడు మహిమపరచాడు                                                          ॥సిరియా॥

4. ఆలాగే ఈ పాపమనెడి పాడురోగంబే

    అది పాడురోగంబే

    యేసు రక్తములో కడుగబడినచో శుద్ధులయ్యెదరు

    ఆహా శుద్ధులయ్యేదరు                                                                 ॥సిరియా॥

…యేసుక్రీస్తు అనుగ్రహించు… జ్ఞానమందును అభివృద్ధిపొందుడి. 2 పేతురు 3:18

పల్లవి : మాటలు లేని పుస్తకాన్ని మరువకండి పిల్లలు(2)

మనసార ధ్యానించుడి రంగులలోన నన్ను(2)

1.బంగారం – పరలోకమునకు గురుతు

   పిల్లల్లాంటి వారిదే పరలోకమనే ప్రభువు(2)          ॥మాట॥

2. నలుపు – పాపమునకు గురుతు

    పాపము వలన జీతము మరణము                          ॥మాట॥

3. ఎరుపు – యేసు రక్తమునకు గురుతు

    ప్రతి పాపము నుండి – పవిత్రులుగా చేయును॥మాట॥

4. తెలుపు – పరిశుద్ధతకు గురుతు

    హృదయ శుద్ధి కలవారే – దేవుని చూచెదరు॥మాట॥

5. ఆకుపచ్చ – ఎదుగుదలకు గురుతు

    వాక్యము ధ్యానించి – ఎదుగుదము రారండి॥మాట॥

… నేనును నా యింటివారును యెహోవాను సేవించెదము … యెహోషువ 24:15

పల్లవి : యెహోషువా యౌవ్వనుడు – మోషేకు పరిచారకుడు (2)

కుడియెడమలకు తిరుగక ప్రభునే (2) వెంబడించిన సైనికుడు (2)

1. యోర్దానును దాటెను – యెరికోను కూలద్రోసెను(2)

    రాహాబును రక్షించి-ఆకానును శిక్షించి దైవనీతి నెరవేర్చెను (2)     ॥యె॥

2. గిబియోనుకై పోరాడుచు – యెహోవాను ప్రార్థించెను

    సూర్యచంద్రులను స్థంభింపజేసి – దైవశక్తి నిల చూపెను                 ॥యె॥

3. ఏడు జాతులను తరిమెను – ఇశ్రాయేలును చేర్చెను

    ప్రతిగోత్రానికి స్వాస్థ్యమునిచ్చి – దైవచిత్తమే చేసెను                            ॥యె॥

..జక్కయ్య… యేసు ఎవరోయని చూడగోరెను… లూకా 19: 2,3

పల్లవి : యేసయ్య ఎవ్వరో అని చూడగోరెను ఎంతో కోరికతో జక్కయ్య (2)

1. పొట్టివాడైనందున చుట్టు జనులున్నందున(2)

    తట్టే ఆలోచన ఎక్కె మేడిచెట్టు – చూచెను యేసయ్యను (2) ॥యే॥

2. జక్కయ్య త్వరగా దిగుము – నీ ఇంట నేనుందును

    ఎంతో సంతోషముతో తెరచె తన హృదయం

    పొందెను నిత్యజీవము                                                                       ॥యే॥